Ivernón.

48 hores ensin dexar de llover.

48 hores de paragües caminando con priesa.

Pero siempre yes a distinguir a daquién que va a l'escontra d'eso; daquién pasiando ente'l golor frescu de les calles moyáes y el soníu la lluvia sobre'l paragües, baxo les ruedes de los coches; daquién a quien, como a ti, présta-y salir a por el fríu na cara y les manes namás que pa saborgar meyor ( y por más tiempu ) el calor de la caldera y del chicolate que dexasti preparáo enantes de salir.

Y, cuando tas por sonreir pa ti porque nun yes l' única que disfruta con eses coses, daste cuenta de que ta pasando otru ivernón ensin qu' Ella apaezca por fin na to vida pa meter la so mano y la tuya nl bolsu la tu trenka, volver pa casa despacio, y no importa-vos qu'l chicolate enfríe mentanto facéis l'amor.

De xuru ...

... si tuviere qu'esplicar por qué soy llesbiana (nl estremáu ya tristisimu casu de que los sentimientos y el deséu pudieren esplicase) escoyería un videu como esti: complicidá ya sensualidá perintenses ensin tocase.
Nun me fai falta saber si elles entienden, si la canción escribiola una muyer pensando na so amante,nin siquiera nun m'importa que'l besu del final puea ser daqué " teatreru": les cantantes d'esti videu tan delantre cientos de persones, pero coles sos voces, miraes y xestos construin una intimidá que namás -yos pertenez a elles.

Dempués de tenete
pa qué querer saber qué hora ye
si ye de nuechi o fai calor
si tamos en branu
si'l sol vendrá o non
o pa qué val una cancion como esta.
Dempués de tenete
pa qué los poetas, los dioses, les duldes
pa qué les almendrales peles calles
pa qué sirven les calles.
Dempués de tenete
pa que querer saber
si ye de nuechi o fai calor
si tamos en branu
dempués de tenete
poetes, dioses, duldes
pa qué les almendrales
pa qué sirven les calles dempués de tenete
¿qué hora ye?
¿ pa qué los quies saber?.

Entamos.

Fai unos tres años entamé el mi primer blog.

Escritu en castellanu, foi apenes la inercia d'aunime a dalgo que-yos prestaba muncho a dalgunes persones del mi entornu,tuvo un primer añu ayenu a l'entusiasmu de tolos entamos, pasó más muertu que vivu el segundu, y en 2010 resucitó ( ye que nun había más que dos opciones: zarralu, o ponese con ello anque fuera de vez en cuando ).

Pa esti que vos toy presentando, nun quise repetir los mesmos errores y tuve dando-y vueltes na cabeza.

Nun ye a dicir que agora tenga perclaro por qué, pa qué, cómo, etc.

Si acaso, pueo dicir lo que nun ye:

• Hai blogues lliterarios: los cuentos inacabaos que tuvieron mudándose conmigo estos años demuestren que nun tengo la disciplina necesaria.

• Hay-los solidarios y comprometíos: soy muyer y llesbiana, pero nun milito.

• Tamién pues atopar blogues personales, los diarios de tola vida coles páxines de papel camudáes en

  lenguaxe html ( o lo que seya que tea detrás d'estes coses ). Pero yo nunca fui quien a llevar un diariu cuando nena ( o cuando mocina, que ye peor...).

D'otru lláu, dando un paseín virtual ( y curtiu) pela asturbitácora, dime cuenta de que faltábame lleer les

aventures, los pensamientos... de dalguna bollo asturfalante.

Bueno, vale, echaba más en falta un cómic de bollos fechu n'asturianu, pero tolo que pueo pintar ye una palmera n'una islla piquiñina y caracolinos faciendo paracaidismu.

Pero escribir, sí que me veo capaz de escribir ( otra cosa ye que sigáis vivos dempués).

Sobre'l papel del asturianu na mi vida tengo d'escribir n'otra entrada.

De momentu,ye bastantina con dicir qu'enxamás foi la mio llingua vehicular, que nun voy a clase y que nun

hay naide nl mi entornu con quien puea falalo.

Asina ye qu'esti blog va ser la mi forma d'aprendelu, l'exerciciu indispensable de poneme a construir el mi

discursu n'otru idioma en vez d'estancame en comprender cuando lu lleo na web, nos poemes de Berta Piñán, etc.

BIENVENÍ@S a les cosiquines de una bollo “asturdaprendiente”.